KALLXO.com ka pranuar një raportim i cili thotë se një mësimdhënëse në Gjimnazin “Haxhi Zeka” në Istog ka regjistruar në klasën e saj një nxënëse, në fund të gjysmëvjetorit të parë.

Sipas raportuesit, nxënësja është sjellë nga një shkollë profesionale në Pejë dhe është regjistruar pa fletëkalim dhe pa miratim të shkollës.

Rreth këtyre pretendimeve, drejtori i Gjimnazit “Haxhi Zeka”, Ibrahim Bytyçi ka thënë për KALLXO.com se nxënësja ka qenë pjesë e kësaj shkolle në klasën e dhjetë, por që kishte kaluar në Shkollën e Artit në Pejë sepse ka prirje për art.

Ai thotë se nxënëses i është përkeqësuar gjendja shëndetësore dhe prindi i saj, i ishte lutur që t’ia mundësonin që ajo të kthehet prapë në Gjimnaz.

“Gjithçka ka shkuar në koordinim me DKA-në, me prind edhe me mua si drejtor. Asaj i mundësohet vetëm provimi i klasës, ka qenë tërë vitin vëzhguese dhe i mundësohet provimi i klasës me Udhëzim Administrativ sepse i ka 2/3 e mësimit. Nëse ajo tregon sukses dhe profesorët duan ta notojnë në rregull por ajo gjithsesi në fund hyn në provim të klasës.”, ka thënë Bytyçi.

Tutje drejtori i këtij gjimnazi, ka theksuar se ndjehet i lumtur që ia kanë mundësuar vazhdimin e mësimit në shkollën që ai drejton, për arsye se nxënësja ka pasur probleme shëndetësore të cilat ia kanë pamundësuar vijimin në Shkollën e Artit në Pejë.

Sa i përket mësimdhënëses, drejtori Bytyçi thotë se ajo vetëm ka kërkuar që nxënësja të jetë pjesë e klasës në të cilën ajo është kujdestare.