Për Ne

Hapësira publike është për të gjithë - jo vetëm për disa. Nuk mundemi përgjithmonë të jetojmë në shoqëri ku dikush e rehaton veten, duke e rrezikuar tjetrin. Kjo u ka ndodhur deri tash këmbësorëve në Kosovë, ku pronarët e ndërtesave, lokaleve, firmave, makinave ua kanë uzurpuar hapësirën për të ecur lirshëm, në kohën kur Kosova, në politikat e saja madhore, lufton për “liri të lëvizjes”, udhëtimin pa viza e kufizime dhe respekt për tokën tonë. Në fakt, realiteti i qytetarit të thjeshtë është që lëvizja e tij është e kufizuar që në momentin që del prej shtëpisë dhe vendosë të ecë e jo t’i hipë makinës. Kjo sepse, këmbësori në Kosovë, mes tjerash, nuk ka pasur zë. 

Projekti “Uzurpatorët e Trotuareve” synon t’i mbrojë të drejtat e këmbësorëve në të gjitha komunat dhe vendbanimet e Kosovës dhe t’i çlirojë trotuaret nga pengesat që e detyrojnë këmbësorin dhe karrocat që të dalin në rrugë. Duke filluar nga nga qendra e Prishtinës, ky projekt i ndan uzurpatorët në 3 kategori: ata që në mënyrë të përhershme e kanë uzurpuar një copë trotuari për vete (qofshin këta persona privatë, organizata apo biznese), ata që shpesh e uzurpojnë trotuarin (kryesisht makinat) dhe pengesa publike siç janë kantat e bërllokut, shtyllat elektrike etj. 

Një hulumtim paraprak i raportuesve tanë i ka identifikuar disa pika në qendër të Prishtinës ku këmbësorët nuk mund të ecin lirshëm nëpër trotuare. Kjo hartë sot, faktikisht i denoncon uzurpatorët dhe autoritetet. Qëllimi i këtij denoncimi është që të përmirësohet kualiteti i jetës së këmbësorëve dhe ëndrra jonë është që nga uzurpatorët e sotëm, të krijojmë çlirimtarë të ardhshëm të trotuareve.

I inkurajojmë qytetarët të marrin pjesë në monitorimin e këtij projekti duke raportuar atë çka ata shohin si pengesë në Kallxo.com, apo duke përdorur Kallxo app si dhe faqen e Facebook-ut të Kallxo. Çdo raportim i qytetarëve do të verifikohet nga monitoruesi ynë.

"Mirësevini në kursin e pengesave ditore të Prishtinës”, nga monitoruesi ynë i trotuareve për përvojën e tij si këmbësor në Prishtinë mund t'ju frymëzojë që të ndani me ne përvojat tuaja.